رُسے ھوئے ݙینہاں دے -ناں
*********************
سبق پُراݨے وِسر ڳئے
شکلاں یاد نہ رَھـیاں
رَستے سَبھ تبدیل تھئے
ویلے نے ٹور وٹائی
ھر ویہڑے تے وَسوں وِچ
ـ ݙِسدے ھِن نویں مُہاندرے
دِل نِکھڑے ھوئے اندروں اندر
ھوٹاں تے مُسکان
اَندر دے ٻُوھے تے جندرے
ـ ٻاھر عالیشان
نندر ھوئے وجود ھِن
سُتے ھوئے چادر تاݨ
وِچ اندھارے ڈُھونڈدے
ڈَھـٹھا ھویا مکان
اِیکُوں آکھن نواں جہان
نَویں سِرے تُوں یار مَناواں
رَت ݙِیوے دی لاٹ جَگاواں
تَـند کَھڑیجی
نَویں ݙینہاں دے نال مِلاواں
اَپݨی وِسری ھوئی کہاݨی
آپ کُوں آپ چِتاواں
پیراں تے سِر رکھ کے روواں
رَت دے نِـیر وَھاواں
مَتاں وِچھڑیا یار ولاواں