جانی! اپݨی راند رَساؤں ھا،وَت آپ کُوں آپ وَساؤں ھا
وَت پِیت پرِیت حَمیلاں،وَت جُھمرِیں بوچھݨ چیلاں
ـ ڳَل کَنٹھے ھَتھ رَبیلاں،وَت اپݨی ڳوری ڳاؤں ھا
وَت بھوئیں اپݨی دِیاں ڳالِھیں،سوھݨے ویڑھے سِنگریاں سالہِیں
وَݨ گھاٹے ساوِیاں ڄالِھیں،وَت مِتریں پھیرا پاؤں ھا
وَت چُوچَک گھر وَنڄ ڄَئوں ھا،وَت ھِیر دا ویس وَٹاؤں ھا
بݨ ران٘جھݨ ویڑھے آؤں ھا،پَر کَیدُو وَس نہ پاؤں ھا
وَت سَسؐی کُن٘وار بݨِیجے،وَت ھوت پُنَل پرنِیجے
وَنڄ اپݨے دُوار وَسِیجے،نہ کیچ ݙُوں اُٹھ دُرکاؤں ھا