اپݨے آپ کُوں بھالݨ بارے
*******************
کیہڑی پوڑی ویندی اے
ہِک تُوں ݙُوجھے دِل توڑیں
دِل دا ٻُوہا کیہڑی تان تے کُھلدا اے
اکھیں کُوں اَݨ ݙِٹھی شَئیاں
کیویں بھال اِچ آن٘دیاں ہِن
جُثے دیاں کن٘دھاں کُوں ٹپ کے
رُوحاں کیویں مِلدیاں ہِن
اَݨ آکھی،اَݨ سُـݨدے کَناں تائیں
کیویں ویندی اے
کیہڑا راہ اے جیہڑا
سان٘ول حرف پکاوݨ نال نہیں لبھـدا
ہَتھ مِلاوݨ تے مُسکاوݨ نال نہیں لبھدا
رنگ برنگے کپڑے پاوݨ نال نہیں لبھدا
او رَسـتہ ہِے ݙُکھ جالݨ دا
لوئیں دے بھانبھڑ ٻالݨ دا
یار دے دِل وِچ جھاتی پا کے
اپݨے آپ کُوں٠٠٠بھالݨ دا