وَت سَچ کُوڑ سَوَلدے پئے ھَیں         شاید آپ دو وَلدے پئے ھَیں         تَیں بِن سان٘ول کون ݙساوے         رُلدے پَئے ھَیں،رَلدےپَئے ھَیں

  سان٘ول سوبھ تے نِکھڑۓ ھاسے         سان٘ول سوبھ تے مِل ݙیکُھوں ھا         کِھلدیں کِھلدیں رو پئے ھاسے         رون٘دیں رون٘دیں کِھل ݙیکُھوں ھا

  نہ لِکھ تَن دی تختی تے نان٘واں پَرایا         نہ جَھل ھاں تے پَتھر بُھکان٘واں پَرایا         قَسم بے پِچھان٘ویں پَـیَمبر دی خادِم         نِوِھی نال ٹُردا ، پِچھان٘واں پَـرایا

  جے ݙُکھ تِھیندے تاں تِھیوݨ ݙے         اے زھر امرت ھِے ، پِیوݨ ݙے         مَـرݨ دی آس ، ھِک پاسے         میکُوں فی الحال جِیوݨ ݙے

  حادثے دا شِکار تھی کھڑدیٔن           قتل تِھیوݨ تے تیار تھی کھڑدیٔن           میݙی مَستک دے ھیٹھ ݙُو صِفریں           تُوں ٹَکردیں تاں چار تھی کھڑدیٔن        

  سَبھے دَر بھر سڳے جیڑھا             حیاتی ھر سڳے جیڑھا               اُوھو خادم اَمـر تِھیندے             مُحبت کر سڳے جیڑھا  

  بے شک رزق اَنند نہ تِھیوے         جُھپڑی،کوٹ بُلند،نہ تِھیوے         خادِم اَکھ دے بند تِھیوݨ تائیں         تانگھ دی طاقی بند نہ تِھیوے

  سَئیں دے نَیناں تے دِید کر گِھنسوں         خواب کوئی خرید کر گِھنسوں         روزے مُکسن تے عِید آ ویسی         چَن ݙِٹھوسے تاں عِید کر گِھنسوں              

  کہیں قد آور نال تَاہـُوں،دوستی نئیں تھی سڳی       سِر تے پَڳ دا بار آڳئے،قد اُچی نئیں تھی سڳی       ڈھیر سارے دوستیں ،پَٹکی لَہا کے سِر بچائے       میں کَنوں تاں معذرت جَہیں،بُزدِلی نئیں تھی سڳی