میں نظم دے نیلے پردے وِچ
تیݙےھَتھ لُکاواں چَس آوے
تیݙے پیر لُکاواں چَس آوے
تیݙے نازک ھَتھ دے چَھلڑے کوں
تا دیر لُکاواں چَس آوے
پَر نظم اڄاں تئیں پہنچی نئیں
لُک چھپ دے چھینویں موڑ اُتے
ڄِتھ بیل گِلٗو دے چھاترے ھیٹھ
سو آلھݨے ھِن انہاں لَفظیں دے
نَویں لفظ ڄِنہیں دے ہَتھیں وِچ
کُجھ چھپن چھپا دیاں ٹوپیاں ہِن
ہِن ایویں موتٔیں مَڑھٗے ہویے
ڄِیویں سانولا تیݙیاں پوپیاں ہِن
اِنہیں موتیٔں مَڑھٔیں پوپیاں وِچ
اِنہیں چھپن چھپا دیاں ٹوپیٔں وِچ
تیݙے ݙِن٘ہہ لُکاواں چَس آوے
تیݙی رات لُکاواں چس آوے
کائنات دی ھر ھک اکھ کولوں
کائنات لُکاواں چَس آوے
پر نظم اڄاں تئیں پہنچی نئیں