ـ ݙُکھڑیں کارݨ ڄائی ھَم
سُولیں سانگ سمائی ھَم
درد اندیشے سَکڑے سورے
ـ ٻیا ناں بِھیݨ تے بھائی ھَم
ـ ڳَہلی کَملی سُنڄڑی دُھر دی
ھِک غَم دی سَدھرائی ھَم
ـ ڄاوَݨ لا دی پَنڈ بَلا دی
چُم سِراکھیاں چائی ھَم
راحت وَیندیں وِداع نہ کِیتم
مائی ھم پر مَترائی ھَم
پِیڑ پُراݨی اَمڑی سَکڑی
مُون٘جھ مُون٘جھاری دائی ھَم
سختی تے بد بختی تَتڑی
حال ونڈاؤ ھَمسائی ھَم
بے ٹھائی دی چولی چُنڑی
پائی ھم پا ٹھمکائی ھَم
سِر تے چَھتڑے،چوٹیاں مَتھڑے
تَیں سَنگ دِلڑی لائی ھَم
ھو ھو پھکڑی شہر خُواری
چاتی فَخر وَݙائی ھَم
کیویں یار فَــریـد وِساراں
ـ ڄَیں کِیتے اِتھ آئی ھَم
**********************