غرِیب کُوں کَیں غرِیب کِیتٔے
امیر زادو جواب ݙیوو
ضرورتاں دا حساب گِھنو
عیاشیاں دا حِساب ݙیوو
سَخاوتاں دے سُنہری پاݨی
دے نال ڄہڑے مِٹا ݙِتے وے
او لفظ موئے ھوئے وی ٻول پوسِن
شرافتاں دی کِتاب ݙیوو
شراب دا رنگ لال کیوں اے
کَواب دے وِچ ھِے ماس کَیندا
شباب کہیں دا اے کَیں اُڄاڑۓ
حِساب کرکے جناب ݙیوو
زیادہ پَھلدا ھے جینکُوں کالا
خرِید گِھندا ھے اُوھو کُرسی
الیکشن دا ڈرامہ کرکے
عوام کُوں نہ عذاب ݙیوو
قـلم ھِے مُنکِر نکِیر شـاکِـر
جِتھاں وی لُکسو ایہہ تاڑ گِھنسی
غِلاف کعبے دا بھان٘ویں چِھک کے
ناپاک مُنہہ تے نقاب ݙیوو