ااُروار تے بھانویں پار ݙِسے
ساکوں جگ سارا دِلدار ݙسے
اُوھو روھی،روہ دے ٻیٹ اندر
اُوھو تھل دَمان دے پیٹ اندر
اُوھو کَچھی دا سِنگھار ݙِسے
ساکوں جگ سارا دِلدار ݙِسے
اُوھو جگ جہان دی رِیت اندر
اُوھو مَندَر نال مَسِیت اندر
اُوھو پِیر ،گُرو، دربار ݙِسے
ساکوں جگ سارا دِلدار ݙِسے
اُوھو چَن تے ݙینہہ دے رُوپ اندر
اُوھو ڄالھ کرِین٘ہہ دے رُوپ اندر
اُوھو پُھلاں رنگ ھزار ݙِسے
ساکوں جگ سارا دِلدارݙِسے