جمہوریت دے شہیداں دی ویل
فیاض باقِـر
دِل ݙُکھیاں لاچاراں دا، خُون کَرݨ اِسلام نہیں
عِشق دے پـیروکاراں دا، خُون کَرݨ اِسلام نہیں
ـ ٻُڈھڑیاں ڳَبھرُواں ٻالاں دا، خُون کَرݨ اِسلام نہیں
ـ ݙیس دے سُچے لعلاں دا، خُون کَرݨ اِسلام نہیں
بُکھ دے بن٘دی واناں دا، خُون کَرݨ اِسلام نہیں
پیار دی سَجری تاناں دا، خُون کَرݨ اِسلام نہیں
خلقت دے دِلداراں دا، خُون کَرݨ اِسلام نہیں
عِشق پریم شِعاراں دا، خُون کَرݨ اِسلام نہیں
خَـیر ون٘ڈاوݨ والیاں دا، خُون کَرݨ اِسلام نہیں
درد کماوݨ والیاں دا، خُون کَرݨ اِسلام نہیں
فَقر تَوَکل مَستاں دا، خُون کَرݨ اِسلام نہیں
اَزلی مَست اَلَستاں دا، خُون کَرݨ اِسلام نہیں
عاجزاں خاک نَشیناں دا، خُون کَرݨ اِسلام نہیں
سَجدے ڳئی جَبیناں دا، خُون کَرݨ اِسلام نہیں
رَبّ دی سوہݨی خلقت دا، خُون کَرݨ اِسلام نہیں
اُمَتِ ہادیِ رَحمت دا، خُون کَرݨ اِسلام نہیں
سَچ دے ٻول سُـݨاوݨ دا، خُون کَرݨ اِسلام نہیں
خلق دے راڄ بݨاوݨ دا، خُون کَرݨ اِسلام نہیں
لوکاں دے ارماناں دا، خُون کَرݨ اِسلام نہیں
درداں دے درماناں دا، خُون کَرݨ اِسلام نہیں