ساݙی دَھرتی،سُگِھڑ دَھرتی،ڄَیندے منظر،صدیاں تاڑیں

ٻاہروں آوَݨ والے وَحشی پیریں ہیٹھ دَپِھیندے رہ ڳئے

ساݙی دردیں ماری دَھرتی دے سینے تے

کِھن٘ڈئے ٹِھیڑ گواہِن

ڄِتھاں ساݙے لال سون٘ہارے، بے خُوندے تھی موئے

ساݙیاں ڄائیاں،بے وارث تھی وَن٘ڄ پرڈیس اَگھاݨیاں

اَڄ وی تاں،ساݙی دھرتی دے سارے مَںظر

وَستیاں،جھوکاں،مومل ماڑیاں،ٹوبھے،تاݙے،کان٘ہہ کَہیلے

جنگل ٻیلے،واہ وہیرے،رَستے چارے

ٻاروں آوَݨ والے وَحشیں دے پیریں وِچ تے

ساݙیاں رُلدیاں رُوحاں روندین،٠٠٠کاک کَںدھی تے ـ