ساݙا لان٘جا مُکدا ویندے
1
اَساں کے تائیں رَت ورتاں خُوشبو ویڑھیاں
وِچ دفناؤں
اَساں کے تائیں اپݨیاں نِـسریاں نَسلاں
مَس لَہندی والے ڳَبھرُو
آزادی دے ہوکے ݙیندیاں بابل ڄائیاں
پُھلیں دی ݙِکھ ݙیندیاں بھیݨیں
تیݙے در بلِیدان کروں، قُربان کروں
ساݙا لان٘جا مُکدا ویندے
2
اَساں کے تائیں اپݨی جِیجل ما کُوں
کُوڑ تَرسّلے ݙیووں
اَساں کے تائیں تیݙی پَت دی خاطـر
کہیں قاتِل ہَتھ دی بَـیعَت دا
اِقرار کَروں
اِتبار کَروں
ساݙا لان٘جا مُکدا ویندے
3
اَساں اپݨا ساہ بچاوݨ سانگے
سِـر سُودھا پِـیو دے پَٹکے دا ٻَہہ وَݨج کَروں
ما دی شال تے بھیݨ دی چادر اُچھل بُھکاؤں
ہُݨ تاں اپݨی بھیݨ کُوں ڳولݨ سانگے
مِٹی کُوں کُھنڈریندے ٻـیٹھوں
اَساں کے تائیں ساہ دا تھورا چاؤں
اَوترے ساہ وِچ لاتھا کیا ھِ
بے مُرادے ساہیں وِچ اَساں کے تائیں جِـیسوں
کے تائیں ساݙیاں جِھک نِوائیاں، کُوڑ کَمائیاں
ساکُوں بے مُل کِیتی رَہسِن
ساݙا لان٘جا مُکدا ویندے
4
اَساں کے تائیں کُوفے بانگاں ݙیووں
کیا تَسبـیح پَڑھوں
اَساں کے تائیں ٻُوڑی مَسنَد دے
کَھڑ در درسال چُموں
کے تائیں ہَن٘جُھوں ہارُوں
ساݙا لان٘جا مُکدا ویندے