جے ڳَل ناھیں لَیندا وَیݨ تاں سُن
سِرُوں نن٘گے پیرُوں راہݨیاں دے
اَساں پَکھی واس نِماݨیاں دے
ساکُوں خواب ݙِکھا کے تَرَقی دے
ساݙی وَسوں سا کَنُوں کَھسؐی ڳئی
کئی ڄنڈ کَھڳل دفنائے ڳئے
سنگ ٻـیر کَری وی دَھسی ڳئی
غُلام بݨا در اپݨے دا
ساکُوں عیش آزادی ݙَسی ڳئی
وسیب ساݙے دی ھَر تریمت
ایویں رُلؐی جیویں سَسؐی ڳئی
کَہیں اَڄ تائیں نئیں آ حال پُچھا
ساݙے سِر کیا بارش وَسی ڳئی
سِندھ واھندے رھے چودھار بھان٘ویں
بَھلا رُوہ دی روھی تَسؐی ڳئی
اَساں آپ مُونجھے ساݙے نَین مُونجھے
ساݙے خواب وی مُونجھ دے ڄائے ھِن
تاریخ،گواہ ھر دور دے وِچ
اَساں کَئی "رنجِیت" ھَنڈائے ھِن
.